AMC sum che vel

Aizawl Municipal Corporation (AMC) chuan tun hnai khan kum 2022-23 chhunga a sum hman tur a ennawn a, AMC budget revised estimate cheng nuai 10,118.48 an pawm. Kum 2022 March thla khan budget estimate cheng nuai 6,659.96 chu pawm a lo ni tawh a, tuna a punna hi cheng nuai 3,548.52 a tling.

AMC hian a sum hmanna 76.76% chu mipui kaihhnawih thil leh hmasawnna na thawhna atan a ruahman a, hetihlai hian 23.24% chu inrelbawlna atan an dah thung a ni.

AMC din hnu leh a din hma Aizawl khawpui danglam dan hi a sum sen aṭanga tehin eng ang chiah nge a nih tih hriatthiam harsa deuh mah se, khawpui inrelbawlna atana a hranpa liau liaua budget ṭhahnem tak dah a nih ṭhin avangin Aizawl hian hma a sawn phah ngei ang tih a rin theih.

Hetihlai hian AMC sum hman danah hian a pawisa sem sawm lo zawng, a hlawm liana hmasawnna ruhrel lian tham dinna lam hawia hman tam theih ni se duhthusam a ni. Political party mi leh sa duhsakna remchang leh, thawh theih awl­sam zawka ṭhena hna tenaua pawi­sa luang ral tam lutuk hi a uiawm a, khawpui hmasawn­na tur ni si hi tute emaw tan kan hmang nasa lutuk ang tih a hlauhawm.

Engpawhnise kum khat chhunga cheng nuai 10,118.48 zet budget nei thei AMC hian ṭha takin hna thawk se, an hnathawh aṭangin mipuiin an teh ṭhin dawn si a.