Social media hman fimkhur

Kum 2023 hi Mizorama Assembly inthlan kum a ni a, inthlan dang ang a nih chuan kumin kum tawp lamah inthlanna hi buatsaih a ni ang. Tun apangin social media lamah politics-a inchirhthehna a nasa tawh hle a, thudik leh dawt pawh thliar hran a harsa ṭan hle.

Inthlan dawna campaign-na ṭha tak chu social media hi a ni tawh a, India ram state dangahte leh ram dangah pawh politician-te'n social media hi an hmang uar hle. Mizoramah pawh social media-in inthlanah awmzia a nei thui ve tial tial a, kum 2023 inthlan lo awm turah pawh social media hian thui tak chu nghawng a nei ngei ang.

Hei vang tak hian political party worker lamin social media-ah lam ṭang neih belh duh avangte leh khingpuite beih duhin thu dik tawk lo thlengin an phuahchawp a, nihna lem insiamchawpin (fake account) midangte pawisawi thei leh nun tichhe vek thei thil te hial pawh an thehdarh hreh lo.

Social media hman thiam kan zir tlan a ngai a, a bikin political party hruaitute pawhin kan party worker-te ṭha zawka kan zirtir a ṭul hle ang. Ṭan luatah hnam intichhe vek thei khawpa thu chhiate thehdarh palh theih a ni a, a dikna finfiahna awm si loa dawt hmanga inbeih chiamte hi sim a hun.

Social media hman fimkhur hi Mizo mipuiten kan zir a ngai a, kumin hian kan fimkhur zual a ṭha awm e.