Halpuah khap chungchang

Hunpui laia halpuah/halmawi khap a ni chungin Mizoram Police-te'n mi 38 manin thubuai 35 an ziak lut a; December 31 zanah bik halpuah thilah mi 16 man niin thubuai 15 ziah luh a ni. Tourism Department chuan an official Facebook page lamah kum thar chibai bukna atan halpuah/ halmawi thlalak a phochhuak a, Aizawla halpuah hal video an dah tel bawk.

Halpuah hal lo turin sorkar leh tlawmngai pawlte'n ṭan an la a, kohhran thlengin ngenna an siam a; nimahsela mipui lamin thu kan awih hleithei lo a, December 31 zanah halpuah ri hriat tur a tam a, a bikin Aizawl khawpuiah chuan khap loh ang maiin halpuah ri hriat tur a tam khawp mai.

Sorkar chak leh chak loh lamah emaw, politics lam hawi zawngin emaw thlir tur a ni lo ang a, mipui leh sorkar lam hi kan thil duh a inang lo a, kan kal duh dan a inmil lo hret a ni thei ang. Heti taka halpuah khapa sorkar a ṭan natlaia kan halmawi a mawi tial tial mai leh a puak tur kan nei ṭha tawlh tawlh mai hi chuan ngaihtuah a tithui hle a ni.

Khati zat kha halpuah a ri a, mihring man zat ngaihtuah hian sorkar hian mi a man ngam/ duh leh tak tak lo a ang hle. Tun thlenga chhui nawn theih turin a video thlengin a awm a, Tourism Department ngei ngei pawhin chibai bukna atan halpuah/ halmawi thlalak a tarlang a, a inhmeh lo hle.

Halpuah zawrh leh hal kan khap dan hi kum tina kan tih ṭhin a ni a, a thlir lawkna leh a thlir letna meeting pawh a awm ṭhin ngei ang a; nimahsela thil thlen dan hi a thlak danglam tak tak lo.

A lehlam zawnga kan sawi duh phei chuan a vanduai tlem tein man an tawk a, a haltu tam zawk an zalen leh lawi si a ang ber mai.

Halpuah hal lo tura kan inzirtir lai leh, a zuar leh haltu an hmuhte an man laia sorkar official media pakhata halpuah/halmawi fakna ang deuh lo lang hi thil inhmeh lo tak a ni a, chutihlaiin kan nihna tak lantirna a ni lawi si. Kan khap a, kan ngam zawng kan man a, man theih loh leh haider halpuah haltu sang tam an awm si a ni ber mai.

Halpuah hal leh zawrh hi khap zel chi a ni nge ni lo tihte thlengin ngaihtuahna a piang thei a, chutihlaiin sorkarin a khap a nih chuan a zawm hi khua leh tui ṭha tih tur a ni.