Kuhva rah check gate

Bilkhawthlir Kuhva Chingtu Society (BKCS) chuan tun hnai khan tuialhthei phurhna lirthei (oil tanker)-a phurh Myanmar aṭanga kuhva rah tawlh rûk eng emaw zat an man a, kuhva rahte chu la chhuakin an hâl.

Dan loa kuhva rah tawlhin Bil­khawthlir a paltlang lohna turin BKCS hi December 14, 2022 aṭang khan an khaw dái hmun pahnihah an duty a. Kuhva phur nia rinhlelh lirtheite an endik ṭhin a; sorkarin check gate a siam belh chung pawha a mipui zawkin sorkar ring tawk loa kuhva tawlh ruk an veng ta mai hi a lung­chhiatthlak a. Hemi piah lamah hian sorkar check gate siam te an rawn paltlang vek thei hi a mualpho thlak viau bawk a ni.

Myanmar aṭanga kuhva tawlh ruk hian Mizoram a paltlang a ni satliah lo a, he smuggling avang hian Kolasib leh Mamit District chhunga chhungkaw tam tak eizawnna a tibuai a, smuggler-te vangin Mizo­ramah kuthnathawktute zawkin an tuar mêk a ni.

Chumi titawp tur chuan Central YMA-in sorkar hotute an titipui tawh a, chumi rah chhuah chu check gate siam belh a ni! Check gate siam belh a nih hnu leh sorkar thuneituten vawi tam tak kuhva ro tawlh ruk tihtawp an tum thu an sawi hnuah vantlang mipui pungkhawm zawkin kuhva tawlh ruk an man reng mai hi a zialo ṭhin hle a ni.

Mizoram sorkar hian kuhva rah tawlh ruk venna tura a check gate siam hi tun ai hian vil ṭha se, kuthnathawktuten hna ṭhulha smuggling an ven reng ṭul lo tur hian a mipuite hma hi ngai deuh teh se.