Smuggler rorelna kan ni em?

Congress Legislature Party Leader chuan Mizoram chu smuggler-te rorelna ramah a chang a ni ta ber mai, tiin press mite a hrilh a, "Kan sorkar hrawn mek hi kan hrawn nawn leh a nih chuan tun hmaa South America rama smuggler-te rorelna ram ang kha kan ni lo ang tih sawi theih a ni ta lo. Tunah pawh kan ni ṭan ta ni berin a lang," a ti.

CLP Leader chuan, Myanmar aṭanga dan phal loha kuhva tawlh ruk chu police-ten an man loh hnuah mipuiin an man ṭhin tih a sawi a, police-te an demawm loh laiin an chunga thuneitute an demawm thu a sawi a; Assam lam smuggler-te Mizoramah an zalen thu a sawi.

Kan ram dinhmun hi a nihna tak hriatthiam a harsa a, smuggling kalpui a nih dan leh man hleihtheih loha an awm reng theih danah hian a phênah thil awm a awm palh ang tiin a rinhlelhawm hle a ni. MLA meuhin hetianga mipui hriata a sawi chhuah tawh hi chuan thil hi chhui chian ngai a awm niin a lang a, politics-a inpuhna mai mai nge ni thil awm tak tak a ni zawk, tih hi mipuiin an hriat fiah a hun tawh a ni.

Kuhva smuggling hi smuggling dangte ang lo takin Mizorama kuthnathawktuten an tuar a, dan bawhchhiatna a nih piah lama mi dangte eizawnna tichhetute kan dang thei lo a nih chuan a fel lo takzet a ni.

CLP Leader chuan Mizoram hi smuggler-te rorelna kan ni ṭan ta berin a hre hial a, smuggler-te hi tuten nge vulh lian a, tute vangin nge an ngampat a, tute nge a phênah awm tih hriat chhuah a hun ta hle a ni.