Mizoram sorkarin na zawkin nawr ngam se

Bangladesh-a Zo hnahthlak raltlante India sorkar leh Border Security Force (BSF)-in ramria an lo dan avang leh, chumi avanga thihna hial a thlen avanga lungawi lohna lantir na'n Central YMA huaihawtin khaw hrang hrang­ah mipui an pung­khawm a, BSF leh central sorkar chet dan duh lohna lantir a ni.

Chittagong Hill Tracts, Bangladesh aṭanga raltlante hi ramriah dan an ni satliah lo a, a lo lut tawhte pawh hnawh kir leh an niin a lang a, a pawi hle a ni. Miin sahimna zawnga ram dang an pan tawh a nih chuan chhawmdawl leh lo dawnsawn hi mihring kan nih anga kan tihmakmawh a ni; chumi piah lamah kan unaute ngei an nih bawk avangin kan hnar tur a ni lo.

Mizorama awm BSF-te hian an sual avanga raltlante hi lo dang an ni ngawt lo a, thupetu an awm vang a ni. BSF-te thu­petu hi Home Ministry lam an nih ngei hmel a, chuti a nih chuan Union Home Minister hi thil engkim hretu tur leh a duh phawt chuan chingfel theitu tur a ni.

Mizoram sorkar hian Union Home Minister hi huaisen takin dawr se. Kan unau raltlante hma an ngai tak tak a nih ngai chuan helaia NGO-te hmalakna thlawp ringawt hi a tawk lo a, a taka central thuneitute an dawr ngam a hun ta.

Tuna sorkar laipui enkawl­tute hi kan Mizoram sorkar vawnfung chelhtuten NDA lama an thawhpui tho an ni a, Zo hnahthlak raltlante lo dangtu BSF-te thupetu tak tak zawk hi a biak ngam a hun ta.