Lo hal hun ngaih pawimawh

State Level Sub Committee on Fire Prevention chuan kumina lo hal hun hnuhnung atan March 15 an rawt a, district tinah ram kang laka invenna kawnga inzirtirna nasa zawka kalpui an rawt.

Ramngaw siam tumin sorkarin sum tam tak a seng a, tha leh sum sengin thing ṭiak ṭhahnem tak a phun belh ṭhin a; nimahsela kan lo neih danin a zir miau loh avangin kan thing phun aia tam hi kan vat chereuin kan hal ral ṭhin.

Loh theih loh avanga thing leh mau chereu a uiawm tawh tehlul nen, fimkhur loh leh inthlahdah avanga kangmei chhuakah thing leh mau tam tak a kang ral fo a, vanduai kumah chuan mihring nunna hial pawh ram kang hian a la ṭhin.

Ram tihkan pawizia hi a takin kan tawng cho mek zel a, sik leh sa inthlak dan a mumal lo tawlh tawlh a, kan tuihnar a kang chat zo dawn a, kan lui thlengin a kám duak duak a ni ber mai. Hei vang hian kan ramngawte kan humhalha kan venhim theihna turin ram kang laka kan inven tlan a ṭul tak meuh a ni.

March 15 hmaa lo hal vek turin sorkarin ruahmanna a siam a, hei hi mi tinin i zawm hram ang u. Lo hal har lutuk chuan khua a lo ṭhal zual tawh a, kangmei a chhuak duh zual bik a; sorkar thu hi awih hram hram ila, thuawih loa kangmei chhuahtute lakah sorkarin hremna na zawk lek kawh ngam bawk se a ṭha hle ang.