A thlawna buhfai sem

National Food Security Act (NFCA) hnuaia inziak lutte hnenah kumin January aṭangin sorkar laipui chuan a thlawnin buhfai a sem dawn a, hemi atan hian sorkar laipui lama Ministry of Consumer Affairs, Food and Public Distribution chuan nikum December khan thu a chhuah tawh. Mizoram sorkar pawhin hei hi bawhzuiin DCSO tin huam chhunga retailer-te a hriattir ve tawh a ni.

Sorkar laipuiin a khua leh tuite tana a thlawna buhfai a sem tur hi a lawmawm a, a chhawrtu mipui tan thil lawmawm tak a ni. Kumin chhung zawng a thlawna buhfai sem hi kalpui tur a ni a, a senso hi sorkar laipui lamin a tum vek dawn a, mirethei leh harsa zawkte tan thil lawmawm tak a ni ngei ang.

Zep thu a cheng lo a, sorkar hnathawk zinga taima leh rinawm tak tak an awmlaiin buhfai leh a kaihhnawih khawihtu zingah rinawm tawk lo an awm ṭhin a, a pawi hle. Mahni hlawh phu loa hausa te, mipui chanai thil danga la peng ṭhinte leh hralh ru duhte thlengin an lo awm tawh ṭhin a, tun ṭuma a thlawna buhfai sem tur hi chu dik leh thianghlim taka kalpui theih ni se a lawmawm ngawt ang.

Hemi piah lam­ah hian politics-a lo kaih luh tum ṭalh mai, a hre lo zawkte buma tute sem leh rawt chhuah emaw anga sawi tum ṭalh chi te, chumi hnialna tur duh luat avanga rem leh rem loa ruling party lo bei ve reng mai te pawh a awm theih.

Tuna a thlawna buhfai sem hi chu sorkar laipuiin a sem tur a ni a, mipuite'n an chanvo tur dik tak hi ṭha takin dawng vek thei se a lawmawm ngawt ang.