Myanmar-in Mizoram chhung an bomb hi

YMA, Tuipuiral Group chuan thuchhuah siamin, Myanmar sipaite'n January 10, 2023-a jet fighter hmanga Mizoram chhunga bomb an thlâk chu an dem thu an tarlang a, Mizoram tana hlauhawm thei khawpa Myan­mar sipaite'n bomb hmanga ramri báwr vel an bei chu tihtàwp a nih theih nan hma la turin India sorkar an phût.

Myanmar sorkar­in India ram chhungah bomb an thlak mai hi an tihpalh pawh lo ni tehreng se India hian a ngaimawh tur a ni a, hei hi chu ring taka au chhuahpui tur thil a ni.

Khawvel ram dang sorkarin India ram chhungah bomb an rawn thlak a ni a, heti chunga India hi a ngawi tlat a nih chuan Mizoram hi a dah pawimawh lo hle tiin a ngaih theih hial ang.

Myanmar lamin an ram chhunga hel pawl bei angah inngai mah se, a nihna takah chuan an pawi khawih hi ram leh ram inkara thil thleng a ni. India sorkar hian he thil thleng hi a hre chiang hle ang a, sorkar mi leh saten a report-na tur dikah thil thlen dan kim­chang hi an hriattir tawh ngei ang.

India ram state danga thil thleng niin ram dangin bomb thlak palh ta se media lama a rik chhuah dan chu a nasa hle dâwn a ni. Mizoram area chhunga Myanmar bomb thlak chungchang hi heti maia tawp tur a ni dâwn em ni le?