CM vuak dup

MNF Adviser leh Aizawl South III MLA ni bawk Prof F Lalnunmawia chuan Chief Minister-in New Delhi-a a vuak dup tawhte chu a takin hlawhtlinna kan hmu mek niin a sawi a, "Fiamthu thawh nana hmangtute pawh tunah chuan an heh a hil ṭan ta," tiin cheng vaibelchhe tam tak senna tur project-te pawh a nih thu a sawi.

Mizorama sorkar awm tawhte hian Chief Minister/Minister/ MLA chak tia an sawi ber ṭhin chu Mizoram chhunga hnathawk thiam leh sum awm angte hmang zai thiam lam aiin 'sum sawi chhuak thei' hi a ni ṭhin. Tuna Aizawl South III MLA thusawiah pawh hian kan Chief Minister-in sorkar laipui lama thil a thlente chu a hlawhtling chho ṭan mek a tihna a ni ngei ang.

Kan state kal zel dan tur leh a kal mek dan thlir hian hmasawnna lam hi a hawi tam lo hle mai a, kan ram hruaitute'n chhuang taka an sawi chu, New Delhi lam aṭanga kan 'sawi chhuah' a la ni deuh mai. He thu a sawi hian kan MLA hi dem tur a ni lem lo a, chhuang taka sawi tur remchang dang a awm lo pawh a ni thei. Kan Chief Minister-in Covid-19 hripui len hmaa a lo zuk sawi tawh project-te chu hripui a liam hnuah a takin a lo chhuak mek tih a sawina a nih hmel.

CM-in a 'vuak dup' kha mipui nawlpuiin kan hrethiam vak lo a nih pawhin tunah chuan a takin a lo lang ta a nih hmel a. Sorkar laipui lamah project hrang hrang a zuk thlen a, chu chu tunah hian a tak a chang ṭan dawn niin a lang a, a hlawhtlin hlan a nghah­hlelhawm tawh hle a ni.