Ramri kan sawiho a, a takah kan buai si

Tun hnai khan Vairengte Aitlanga hmunphiah huan neitute chu an hmunphiah la tura an kal Assam Police-in tidingin kumin chhunga hmun­phiah lak an phal loh tur thu an lo hrilh.

Vairengte chheh­vel ramri buaina hi a tawp hleithei lo a, tuna kan buaipui dan thlir hi chuan a tawp mai dawn pawhin a lang lo. Ramri buaina chinfel tumin state hotu lu ber ber an indawr tawh a, chutihlaiin a ramri chhehvela mi chengte berin harsatna an la tawk chhunzawm zel mai a, a pawi hle a ni.

Assam leh Mizoram ramri fel lohzia tichiangtu ber chu state pahnih police-te'n an veng tawn reng mai hi a ni a, police hun leh tha bakah sorkar sum hekin state leh state ramri hi hmun tam takah an la veng thluah a ni. Ram dang nena kan inrina pawh ni lo, ṭhenawm state-te nena kan ramri a vena ven a la ṭul chhung hi chu kan ramri buaina hi chinfel a la ni lo tih tichiangtu a nih mai hmel.

Ramri buaina hi chinfel tumin sorkar­in theihtawp a chhuah a. Tun hmaa thleng zen zen lo Assam sorkar aiawhte nen pawh level hrang hrangah inbiakna an kalpui thei a, a lawmawm hle. Chutihlaiin tun hma ai zawngin ramria chengte hian buaina an tawk zing a, hei hi ramri a la fel loh vang a ni ber. Ramri hi a taka chinfel hlan a nghahhlelhawm ta hle a ni.