Lunglei Municipal Council

Lunglei khawpui enkawltu tur Lunglei Municipal Council (LMC) pisa tur chu tun hnai khan hawn a ni ta a, kumin kum tir lamah LMC enkawltu tur inthlanna neih a ni ang.

Aizawl Municipal Council din a nih tirh khan mipui nawl­puiin municipal body chungchang hi an la hrethiam lo hle mai a, politician leh sorkar hnathawk zingah pawh a nihna pawh lo mi eng emaw zat an awm tih a lang. Hun a kal zel a, AMC pawh a ṭhang chho ve zel a, zawi zawiin a insiam ṭha chho mêk a tih theih ang.

Lunglei hian Aizawl tihsual­ah inzirna remchang tak an nei mek a, Aizawlin a municipal council neih a bul ṭan dan a fuh tawk loh avanga sum a hman dante thlengin zir chiang se, municipal council ṭha zâwk din thei ngei se a duhawm hle.

Khawpui dangah infra­structure lian tham dinna atan te, khawpui chen a nawm zawk theihna tura ruahmanna atan leh khawpui tana ṭangkaiah municipal body an hmang a. Aizawla a indin tirh kha chuan sorkar berin hnathawk hleithei loin a awp bet phawt a, a sum awm ang angte pawh hna tenau thawhna atan an hmang nasa hle a, hmasawnna ruhrel lian tham lam aiin a hna hmutu tam lam an tuipui deuh niin a lang thei.

LMC-ah hian eng party pawhin hnehna lo chang se a pawimawh berah chuan khawpui tan hma­sawnna tak tak ngaihtuah se; municipal council hi sorkarna dintu political worker-te hna siamsaktu lam ni loin khawpui hmasawnna tak tak tura thawktu a nih hi i dah pawimawh hmasa ang u.