Kawngpui chhia sorkar mawhphurhna

Tunlai hian Mizoram châk lâkna NH-54 kawngpui chu Bualpui leh Kawnpui inkarah te, Kawnpui-Khàmráng inkar leh Khàmráng-Buichali inkarah a chhe hle a; lirthei tam tak an tangkhan tawh bakah lirthei ṭhenkhat chu kawngpuiah an tâng a, lirthei let/ tlu a khat tawkin a awm bawk.  NH-54 kawngpui hi National Highways and Infrastructure Development Corpo­ration (NHIDCL) enkawl lai a ni. 

Kan state kawng­pui pawimawh bera chhal theih heti tak maia a chhia hi a zialo hle mai a, sorkar a inthlak hnuah pawh kawngpui pawimawh hi a la chhe chhunzawm zel a ni ber mai. He kawngpui hi Mizoramin state pawn aṭanga bungrua kan phurh luhna ber a ni a, bungraw phur  lirthei tlan ngam loh khawpa a awm chuan a tuartu chu mipui bawk an ni. 

 Sorkar chuan chhuanlam tur ṭha tak a nei sâ a, he kawng hi state sorkar enkawl ni loin NHIDCL kut a nih tawh thu an sawi ngei ang a; nimahsela he kawngpui hi mi state-a awm a ni lo a, Mizoram chhunga mi a nih miau avangin Mizoram sorkar hian a kut a sil thei lo ang. 

Kawngpui siam tura thlan tawhte hian an siam ṭha tawk lo emaw, hna an thawk muang emaw, an hna an tlin lo a nih pawhin a nawrtu tur chu sorkar a ni a; kawng chhiatna hmun tlawh zin dup ringawta a chhe lai siam leh si lohte hi thil inhmeh lo tak a ni. 

Mizoram sorkara vawn fung chelhtu political party hi kawngpui ṭha ngai pawimawha inchhal, Assembly rorelna in sangah pawh kawng­pui a ṭhat em avanga lawmthu sawina hman ni lawka lo pu lut tawhtu an ni a; kawng a ṭhat laia hmingṭhat lâk tuma Assembly House-a lawmthu sawina pu luttu political party-te hi kawng a chhiat takah hian an tlanchhe thiang lo ang.