Certificate pawimawh leh Mizoram

District chhunga mihring piang leh thite dan hnuaia felfai taka chhinchhiah leh certificate dik leh felfai tak pekchhuah a nih theihna tura hmala tura din, District Level Coordination Committee (DLCC) under Civil Registration System of Births & Deaths chu Champhai District Bawrhsap hoin tun hnai khan an ṭhukhawm a. Certificate siam chawp leh a lem hrang hrangte man chhuah kawngah ṭanrual a pawimawh thu leh uluk lehzuala ven a pawimawh thu tarlan a ni a; raltlan leh ram dang aṭanga dan loa lo lut, piang leh thite dan anga register theih an nih loh thu pawh tarlan a ni.

Mizoramah hian tun hma deuh aṭang tawh khan sorkar document pawimawh hi a lem hmuh tur a awm fo ṭhin a, tun thleng pawhin hetiang thawm hi hriat tur a la awm a, a pawi hle a ni. A lem siam chawp a awm rual hian dan anga ziah luh theih loh mi ṭhenkhatte dan anga lo ziak lut duh mai official zingah an awm bawk ṭhin a, a vanduaithlak takzet a ni.

Zo hnahthlak unau kan nihna tidal si lo hian dan chu dan a nih anga ṭha taka kenkawh mai hi a himin a tlo ber a. Ram danga kan Zo hnahthlak unaute pawh an chen mekna ramah dan anga an inziak lut angin chutah chuan awm mai se, Mizoramah an lo lut a nih pawhin dan anga ziah luh a remchang lo a nih chuan a lema inziah luh hi tih loh atan a ṭha hle.

Tuna kan kal­phung en hian a duh leh ngamte chuan sorkar document pawimawh hi an siam chawp mai ṭhin a ang a, certificate lem hmanga an nih loh tur ni te, an tel lohna tura telte leh an dawn loh tur dawngte thlengin an la awm zel niin a lang a, hemi kawngah hian kan fimkhur a ṭul takzet a ni.