Assam Rifles sawn politics

23 Sector Assam Rifles Commander thar chuan tun hnai khan Chief Minister a hmu a, Chief Minister hian Aizawl khawpui laili aṭanga Zokhawsanga an insawn chhuah tur chungchang a lo sawipui a, a hma thei ang bera insawn tura a duh thute a lo hrilh.

Assam Rifles insawn chhuah chungchang hi hun rei tak chhung chu politics thilah kan kai lut lui tlat a, tun hnaia CM-in AR hotupa a bia pawh hi mi tam tak chuan an sawisel. Chief Minister tan state pakhat AR hotupa lo kawm hi tih loh tur a nih thu te, Sector Commander level-in insawn leh insawn lohah thu an neih loh thu te, ani hnena Zokhawsanga insawn chungchang sawipui hian awmzia pakhatmah a neih loh thute sawiin CM hi an dem.

Hetihlai hian kan CM hian AR sawn chhuah hi a duh tawhin ṭhahnemngaih thilah a lo titipui a ni mai a, thil âwm lo a nihna a awm hran lo ang. Kum 2019 khan Lammual hi Mizo mipui kuta a awm tur thu an lo puantir tawh a, kum 2022-ah Amit Shah lo chhoa Zokhawsang hmunhma hawntir tur thu an lo sawi sualtir tawh bawk a, sorkar laipui lam zawk hian kan CM hi thu dik lo an sawitir a ni zawk ang.

AR insawn chhuah hi state sorkar tih theih chu ni se an insawn chhuak daih tawh tur a ni a, an insawn loh pawh hi state sorkar mawh a nih chuan loh avangin dem tur an awm lo e.

AR hi engtikah emaw chuan an la insawn chhuak nge nge dawn a, chu chu state sorkar tih theih a nih loh avangin tumahin tualchhung politics-a hamṭhatna atan hman tum lo se. Tuna an nawr chhuak thei lawk lo pawh hi state sorkar chak loh vang a ni hek lo.