Assam-in Aitlang min chhuhsak em ni?

Vairengte ram Aitlanga hmunphiah huan neitute chuan an hmunphiahte an seng thei lo a, Assam Police-in phalna an pe thei lo. Mizoram sorkar aiawhte chuan hei hi an buaipui mek a, hmunphiah huan neitute hi ID card siamsakin hmunphiah an seng theih dan turin ruahmanna an siam.

Vairengtea Mizoram sorkar aiawh mi leh sate'n a khaw mite harsatna hriaa sut kiangpui an tum dan hi thil lawmawm tak a ni a, miin a kut hnathawh rah a seng ngei theihna turin ID card-te hial an siamsak niin a lang a, a lawmawm hle a ni.

Chutihlaiin thil awm dan dik tak hi thlir chuan Aitlang hi Assam-in an nei nghet tawh tihna a ni ber a, chuta kal tura ID card kan sorkar aiawhte meuhin an siamsak tawh a nih chuan Assam hnenah Aitlang hi hlan fel a ni tawh tiin kan sawi thei em?

Vairengte mi leh sate ngeiin an ram chhung Aitlanga an hmunphiah seng tura Assam police-te phalna la tura ID card siam a ngai ta hial hi thil serious tak a ni a. Ram leh hnam humhalhtu pawl tan te, ramri ngaihventu pawl leh ram hma­ngaihtu zawng zawngin ngawih­pui mai loa chik zawka zir chian chi a nih hmel e.