Internet hmanga inbumna

Mizoram Police chuan thuchhuah siamin, tun hnaiah Reserved Bank of India (RBI) master card lem hmanga inbumna a awm ṭhin avangin fimkhur turin mipui an chah.

Internet leh phone hmanga inbumna hi a kum telin a pung a, an bum dan ni se kawng hrang hrangin an kalpui thiam si a, mipui tán pawh inven thiam a harsa hle ang.

Lehkhathiam lo leh a hmangchang hre lo zawkte hi chu an lo bum palh a nih pawhin a hriatthiam theih a, nimahsela lehkhathiam pui pui te thlengin bumin an awm ta fo a, hei vang hian a bumtu lam inzirna leh thiamna hi kan man phak lo hle niin a lang.

Inbumna ṭhenkhat hi chu hlawkna um vanga inbumna a ni a, tun hnaiah hi chuan bank lam thil fel lo chingfeltu nia insawiin thiam takin mi an bum ṭhin. Hei vang tak hian bank lam pawhin an customer-te bank account him zawka a awm theihna turin mawhphurhna lian tak an nei ve a, mipui zirtirna hi chak zawkin kalpui thei se a lawmawm hle ang.

Pawisa thila inbumna hi kawng hrang hrang a awm tawh a, mipui nawlpui tana inzir harsa khawpin a bumtu lam hian inbum dan thar hi an nei thei zel a ni. Hei vang tak hian mipui lam pawh kan fimkhur a ngai a, thuneitu lamin mipui hi an venpui reng a ṭul bawk.