Vawk leh vawksa lakluh
Champhai district magistrate chuan, vawk pûl hri, African Swine Fever chu ram dang aṭang la rawn lut thei reng a nih avangin Champhai district-ah Mizoram páwn aṭanga vawk, vawk sa leh vawk sa aṭanga thil siam te lak luh khapna thu a chhuah.
Hetihlai hian Disaster Management & Rehabilitation (DMR) department chuan December 2, 2022 khan Mizoramah Krismas leh kumthar lawmnaah vawksaa indaih lohna phuhrûk a nih theih nan Mizoram páwn aṭangin frozen vawk sa lak luh phal a nih thu a tarlang a; KT Business chuan ASF len lohna state aṭangin frozen vawk sa kg 37,767 an lalut.
He mi hma deuh, November 25, 2022 khan Mizoram Pig Farmer Association (MIPFA) chuan Mizoram páwn aṭanga Mizoram sorkarin agency kaltlanga vawk sa lak luh a tum chu kaltlangpui lo turin Chief Minister an ngen a; an ngenna lehkhaah chuan ASF a lèn leh a hlauhawm thu an ziak a ni.
Vawk leh vawksa lakluh leh a khapna chungchangah hian sorkarin thu fel tak a neih a ṭul takzet a; hun rei tak chhung ram pawn leh state dang aṭanga vawk, vawk note leh vawksa lakluh a khap chhung khan Mizorama vawk farm neite pawh vawk tipung thei loin an awm a, sâ zuarte pawhin an tuar hman hle a ni.
Chutihlaia Chief Minister phalna neia state pawn aṭanga vawksa tam tham tak sorkarin lakluh a phal leh thut leh, tuna Champhai DC thuchhuahte en hian, hun rei lote chhung tute emaw remchang siamsakte pawh a ang thei lek lek a, Mizorama vawk sa zuarte tana chet ve theih si lohin a lalut thei chhungten tam tham tak an lalut thei lawi si niin a lang.