Mau/ raw chi supply-tute hi

Mizorama mau/ raw chi supply-tu tur tender chhángtu awm chhun chu Growmore Biotech Ltd., Tamil Nadu an ni a, an director chu Dr N Barathi a ni a; RTI Act hmanga zawhna sorkarin a chhan danin Growmore Biotech Ltd. hian Mizoramah mau/ rua tihchanna hmun (second hardening nursery) an nei. 

Mizo mipuiin an ngaihven em em mai chu sorkar lai MNF party-in 'flagship programme' atana an hman mek, SEDP hnuaia mau/raw chi supply-tu chungchang hi a ni. Sorkarin hri leng karah a chi supply-tu tur zawngin tender a chhuah a, chhangtu pakhat chiah a awm a, hei hi mipuiin mak an tih thu an sawi nasa tawh hle. 

A chhangtute hi hriat a ni lo a, RTI Act hmanga zawh a nih hnuah sorkar lamin an chhang chiang ta a, Tamil Nadu lama awm Growmore Biotech Ltd an ni. Anni hi an website lama a inziah dan chuan an hotupa ber chu Agricultural Scientist Dr. N Barathi a ni a, kum 37 zet tissue culture lama tawnhriat lo nei tawh a ni a, mau bikah hian kum 18 chhung tissue culture a lo buaipui tawh a ni. Ani hi tuna kan chief minister ni tain MLA inthlan dawna media hmaa a sawi ṭhin nen khan a hming leh a nihna hi a inang chiah a, mi thuhmun ngei an niin a lang. 

RTI Act chhanna aṭanga a lan danin anni hian Mizoramah hian authorised distributor F Lalhriatpuii an nei a; nimahsela thil danglam tak chu Growmore Biotech-in earnest money cheng nuai 25 an thehluh cheque chu F Lalropuia hmingin a ni a, ani hi Mizoram sorkar hotu lian nena inhre hnai tak nia sawi a ni. Growmore Biotech Ltd hian an company nihna leh an hnathawhte chiang takin an website-ah an ziak lang a; nimahsela Mizorama mau/raw chi supply thu hi chu an la tarlang tel lo a, hei mai hi ni loin Mizoramah authorised distributor an neih thu pawh hi an website-ah hian hmuh tur a awm lo a; Growmore Biotech Ltd website-a an chanchinthar 'news' tih section-ah pawh helam thil hi an la tarlang lo. 

Engpawhnise dan ang thlapa tender chhuah a nih a, dan ang thlapa miin an chhang a, sorkarin dan ang thlapa supply phalna an pe a nih chuan sawisel hleihtheih pawh a ni lo a; nimahsela dan ang thlapa thil kal ni si mipuiin an sawi zui neuh neuh tura thil inthup a awm a nih si chuan khuareiah a lang chhuak leh ngei ang. Tuna mipui zawhna lian tak chu, "Growmore Biotech Ltd.-in Mizorama hmun an lo nei ve reng mai hi eng tik aṭanga hmalakna inṭan nge a nih a, eng vanga Mizoramah teh daih hmunhma neia hma lo la ngam nge an nih a, eng ti teh miala sorkarin tender a chhuah tur mau/ raw chi ber kher lo kui ṭiak 'fuh chat' nge an nih?' tih hi a ni awm e. 

Mau/raw hmanga sum kan hai luh hmain tuten emaw a chi supply-in sum an lo tuak palh ang tih hi mipui hlauhthawn ruk a ni. Tuna mau/raw chi supply tura thlante hian kan ram intodelhna tur leh miretheite din chhuahna tham mau/raw chi ṭha tak supply thei se a duhawm khawp mai.