Mizoram Kohhran Hruaitute Committee (MKHC) chuan, Uniform Civil Code (UCC) chungchang, kuhva ro tawlh leh Mizorama kuhva tharte hralh a nih theihna turin Chief Minister hnenah thu thlen an tum. 
Kohhran hruai­tute ngai­mawh thil hi ngun taka thlir chuan, politics lam thil ni loin ram, hnam leh sakhaw khawih thil a ni a, hnam pumin beng sika kan ngaihtuah a ṭul khawp mai. 
UCC nihna tak hi hre fuh ila keini ang hnam tlem lutuk leh ram chhunga sakhaw te zawkte tán chuan thil hlauhawm tak a ni a. Hei hi politics-a kan ṭan zawng a inan loh vang ngawta duha duh loh chi a ni lo a, Mizo kan niha Kristian kan nih bawk chuan tuna an duan dan hi chu thil hlauhawm tak a ni. Hei vang hian MKHC pawhin a tih tur dik tak tiin Chief Minister-ah thlen an tum a, tun hi ram tana ngaihtuahna sen hun pawimawh a ni. 
Hetihlai hian kuhva ro tawlh ruk hi smuggling a ni a, dan bawhchhiatna langsar tak a ni a, tun thlenga huaisar taka an la kalpui ngam mai hi thil fel lo lian tak a ni. Hei hi politics thil a ni lo a, ram leh hnam thil niin Kolasib leh Mamit District lama kuthnathawktute thawhrim rah tel thei loa siamtu a ni a, na taka do a ngai. 
MKHC thil ngai­mawhte hi kan ngaimawh loa kan en liam mai a nih chuan ram leh hnam kan hmangaih lo hle niin a ngaih theih a. MKHC thil tih tum kan thlawp lo a nih phei chuan ram aiin political party kan dah pawimawh a ni ang a, a fel lo hle ang. 
MKHC-in Chief Minister hnena thil an thlen tur hi CM hian lo pawm ringawt loin a takin bawhzui ngei se a lawmawm hle ang.