Revised online ILP

Home Minister chuan tun hnai khan online kaltlanga Inner Line Permit (ILP) dilna leh siamna portal thar, Revised Online ILP Portal Phase-I a hawng.

Kum 2019 khan online-a ILP dil theihna hi siam a lo ni tawh a, Covid-19 len vanga tihtawp lailawk a nih hnuah changtlung zawk leh khualzinte tana awlsam zawk turin duan a ni.

Hetianga tunlai thiamna hmanga awlsam zawka ILP dil theihna siam hi thil lawmawm tak a ni a, hei hian check gate ṭhenkhata ILP siamtirnaa thil fel lo thleng ṭhin nia sawite pawh thui tak chu a veng thei ngei ang. Hetihlai hian ILP pek chhuah danah fimkhur a ṭul zual dawn a, tunlaiah internet hmanga inbumna tam tak a awm thar a, a sual leh thiam site tan chuan awlsam zawka ILP lem siam zung zung theih a ni palh ang tih a hlauhawm hle.

He thil duangtute hian a hman sual theih dante thlir chungin fimkhur takin an kalpui ngei ang tih a rin theih a, an duan chhan ang ngeiin awlsam zawk leh ṭangkai zawka hman theih ni se. A pawimawh ber erawh chu ILP hman sualna awm loin Mizoram leh hnam tana thil pawimawh ILP dik leh ṭangkai zawka hmanna lo ni tawh mawlh rawh se.