MNF returnee-te dinhmun

Mizoram Lok Sabha MP chuan MNF returnee hotute chu sorkar laipui a Union Home additional Secretary Pijush Goyel a hmuh pui a, Mizoram leh India sorkar inremna thuthlung anga returnee-te chhawmdawl chungchang an sawipui.

Kum 37 kal ta khan MNF leh India sorkarin remna an ziak a, he inremna anga tihhlawhtlin loh a la awm cheu hi a fel lo hle. Kan sorkar hian MNF returnee te hi a ngai pawimawh lo tih rual ni lo mah se, tuna sorkarna vawn fung chelhtute term tawp dâwn hnaiha thuneitu lam an dawr chauh erawh an che tlai deuh niin a ngaih theih.

Mizorama MLA inthlan a hnaih deuh apianga kawng hrang hranga sawi rik hlawh fo chu MNF returnee chungchang te, remna hmuh theihna tura lalṭhutthleng ken leh ken loh inhnialna te, martar ruhro tihte leh thil dangte a awm.

Hengte hi kan ram politics-a thil pawimawh a nih ziah avangin tharthawh leh ṭhin pawh a ṭul a ni thei e. Chutih rualin kum 40 dâwn remna a awm hnua MNF returnee-te chhawmdawlna chungchang sawi a la ngai fo hi a zialo a, remna thuthlung angin an chanvote pek ngei ni rawh se.