Khawtlang rawn loa Local Council din?

Zemabawk All NGO Coordination Committee chuan, Aizawl Municipal Corporation (AMC) Board of Corporator-in December 16, 2022-a an ṭhukhawmah Zemabawk Local Council aṭanga Zemabawk East Local Council leh Zemabawk West Local Council din dilna an pawm chu an duh loh thu an tarlang a; boruak chhe zawk a thlen loh nan tipuitling lo turin Chief Minister leh Aizawl Mayor an ngen.

Zemabawk hi Local Council awm sâ chu ṭhiah a ni a, tunah hian AMC hnuaia administrator-in a enkawl lai an ni a, chutihlaia AMC hotuten local council thar an piantir tur hi mipuiin an ngai thiam lo hle niin a lang.

He thil hi veng pakhat chhunga inrelbawlna mai mai anga en liam chi a ni lo a, Zemabawka Local Council inthlan buatsaih a nih loh chhan aṭanga ngun taka chhût tur a nih hmel. Zemabawk hi Local Council nei loa dah reng chi a ni lo a, inthlan a hun tawh chuan a remchan loh dan zawng loa a remchan theih hram dan zawnga inthlan buatsaih hmasak hi thil kalhmang a ni awm e.

Hemi zawh hian khawtlang hruai­tu tharte nen inrawn tlanga Local Council thar din a nih dâwn pawhin hma la chauh se a finthlak hmel a. Mipui thlan lal khawtlang hruaitu (Local Council member) awm loh lai châng ni awm taka khawtlanga pawl hruaitute (NGO lam) pawh rawn loa Local Council an piantir a nih chuan, khawtlâng mipui duh loh dan zawngin thuneituten ro an rel tihna a ni dâwn a, hei hi democracy-ah chuan thleng lo atana ṭha zawk a ni.