Kangmei laka fimkhur hunlai

January thlà tawp lam kan thleng leh ta a, khua a ṭhal chho ṭan ta bawk. Kum tinin Mizoramah khaw chhung leh ram lamah kangmei a chhuak ṭhin a, fimkhur tura inzirtir a ṭul takzet a ni.

Kangmei chhuak zingah hian vanduai vang liau liaua chhuak palh a awm thei a, chutihlaiin a tam zawk hi chu inven theih thil niin fimkhur loh vanga kangmai chhuak hi hmun tam takah a thleng ve bawk niin a ngaih theih.

In lama kangmei chhuaka chhuanlam awm sâ fo mai chu 'electric kal sual vang' tih a ni a, hei hi finfiah hleihtheih si loh kangmei chhuah chhana sawi fo a ni. Hetiang laka kan fihlim theihna turin kan electric wiring-te uluk taka endik ni se, siam ṭhat ngai a awm a nih chuan tun hi inven hun a ni.

Ram lama kangmei chhuak tam zawk hi chu lo halna aṭanga kang kai te niin mei kawng siak ṭhat tâwk loh vang te, lo hal nia ven ṭhat tâwk loh vangte a ni hlawm a. Chutihlaiin lo hal nia thlipui tleh avanga vanduaina thleng te pawh a awm thei.

Kangmei chhuah duh bikna in leh ram hi a awm hran lo a, kan fimkhur tawk lohna hmunah kangmei hi a chhuak tam ber a, kangmei chhuak palh thei lakah mitin i fimkhur thar ang u.