Nungcha humhalhtu vs nungcha suattu

Tun hnaiah Tuirial hnar lama nungchate chu tura hrai an ni a, EFCC department, Save Mizoram River hruaitute leh Muallungthu VC-te'n an endik hnuah police hriattir a ni.

Mizoramah hian nungcha humhalh duhtu an pung zel a, a bikin ṭhangthar zingah nungchate a taka humhalh duhna a lian tawh hle. Hetihlai hian mi ṭhenkhat nungcha humhalh kawnga la harh chhuak ve lo mai ni lo, nunrawng taka nungchate laka che duh an la awm bawk a, a pawi hle.

Khaw tam takin an ram an humhalh a, a chhungah ramsate pawh an inthlah pung zel a, lui tuite humhalhin sangha leh nungcha dang pawh an pung zel. Khualzinte'n lei aṭanga an thlir theih tura sangha humhalh pawh khaw eng emaw zatah an awm tawh a, nungcha kan humhalh dan thlir hian lawmna tur a tam hle a ni. Nungcha humhalh hi intihhmuh zel atan pawh a duhawm khawp mai.

Hetihlai hian tura lui tui hrai duh mai te, dynamo leh bomb hmang duh hialte an la awm a, chu'ng zingah chuan kan mi pawimawhte hming pawh a la ri chhuak hial mai hi a vanduaithlak hle. Tura sava hrai hreh miah lo, silai ṭha chi hmanga sava suat duh tlat kan la neite hi a pawi a, heng mite hi dan anga hrem zel a ṭha hle.

Mizoramah nungcha humhalh duhna lian tak awm tawhin mi nawlpui an harh tawh a, chutihlaia nungchate hrai leh suat hreh lo kan la awm hi a thinurthlak a, man chhuaha dan anga hrem ngei a ṭul hle a ni.