Fimkhur tura kan inchah nawn a ngai
August 1 khan Mizoramah Covid-19 positive mi 55 hmuh chhuah thar an ni a, Mizorama ni khata hripui vei hmuh chhuah tam ber ni a ni. Heng zingah hian Chanmari Venga hotel pakhata hnathawktu mi pahnih an tel a, khawi aṭanga kei nge an nih hriat a nih loh bakah, hri an vei tih an inhriat loh avangin hmun hrang hrangah a lo kal darh hman a ni.
Mizoram hi Covid-19 dona kawnga India ram hmun dangte entawntlak khawpin kan tiṭha a, mipui nawlpuiin sorkar hmalaknate an thlawp mai ni loin an hun, tha leh sumte hri dona atan an thawh a, tlawmngai pawlte leh kohhran thlengin theihtawp chhuahin an ṭang a ni. Sorkarin theihtawp a chhuah bawk a, tun thlengin he hripui avang hian Mizoramah nunna chân an la awm lo a, a lawmawm takzet.
Covid-19 kan hmelhriat tirha Mizorama total lockdown puan a nihlai ai khan tunah hian he hripui hian min chenchilh chiang tawh a, tuna kan dinhmunah phei chuan vantlanga ṭai darh palh thei ang hialin kan awm a; nimahsela tun thleng hi chuan kan zavaia thawhhona zarah vantlangah a la ṭai darh lo niin a lang.
Tun hnaiah kan ramah ngei hri kai thar an pung chho ta zel a, hun rei tak chhung Covid-19 laka kan himna tura kan inzirtirna kha uar zawka kan hman a ṭul lehzual ta a ni. Kut sil tura kan inzirtirna, hmai tuam tura kan inchahte leh vantlanga awm khawm lo tura kan inhrilhte kha a taka hman zel a ngai. Eizawnna avangin inkharkhip reng theih a ni lo a, kan inhawn zau leh tak avangin kan ralmuang ta a ni lo a, a nihna takah chuan kan dinhmun hi a hlauhawm sawt zawk a ni.
Veng leh khaw ṭhenkhat mipui vantlang himna turin total lockdown an puang mek a, mi ṭhenkhat chuan thil ṭul lo tawpah ngaiin an sawisel a ni mai thei a; nimahsela tun hmaa hri kai kan awm nge awm lo tih pawh kan inhriat hmaa total lockdown puanga kan hlauh em em lai khan tun hi fimkhur lehzual hun a ni zawk tih kan hriat tlan a ṭha hle.
Covid-19 laka Mizoram mipui kan him zel theihna tur leh, vantlangah he hri hi a darh lohna turin kan zavaiin kan pawimawh a, theihtawp chhuahin ṭan i la thar ang u.