Uniform Civil Code

Mizoram Kohhran Hruaitute Committee (MKHC) hruaitute chuan Chief Minister hmuin Uniform Civil Code (UCC) dodal kawnga chak zawka hma la turin an ngen a; hetihlai hian MNF Legislature Party ṭhukhawm chuan UCC chu ṭha lo an ti a, Assembly budget session lo awm tura UCC duh lohna pass dan kawng dap an rel.

UCC hi thil chinchang hre deuhte chuan hun rei tak chhung an lo zir chian tawh, Mizo tana thil pawi thei, Kristian sakhaw zuituite tana thil pawi thei awmah an ngai deuh zel. Hetihlai hian sorkar laipuia roreltu BJP kaihhruai NDA sorkar hian India ram puma hman ngei tumin ṭan an la ve mek bawk.

UCC hnuaiah hian India ram pumah mimal thilah (personal law) dan thuhmun hman tura tih a ni a, sakhaw hrang hrang vuantute, mipa leh hmeichhiate pawh dan thuhmun hmang vek tura tih an ni ang. He dan hian inneih chungchang, inṭhen chungchang, ro inhlanchhawn dante leh mimal khawih bik dan hrang hrangte a huam dawn a, tuna mahni sakhaw dan ṭheuha kal hi rem tawh loin UCC hnuaiah chuan India ram pumah dan inang hman tlan tawh tura tih a ni.

Hei hi kaltlangpui a nih chuan hnam tenau zawkte tan thil ṭha lo zawk thlen thei a ni a, sakhaw tlem zawkte tana harsatna tam tak thlen theitu a ni. UCC hi Mizo mipui nawlpui hian kan la hmelhriat chiang tawk loin a hlauhawmna leh a nghawng theihte kan la hre vak lo a ni mai thei a, tun aṭanga chîk zawka ngaihtuaha kan ram, hnam leh sakhaw tana a him lo a nih chuan kan zavaia do chi a ni ang.

Hetiang thilah hian kohhran, political party leh pawl hrang hrang ṭang rual thiam ila, UCC hi kan ran, hnam leh sakhaw tana him lo thei a nih avangin kan zavaia inlungruala dodal chi a ni.