State dangte entawntlak kan ni em?

North Eastern Council Golden Jubilee lawmnaa thusawitu Chief Minister chuan, hmar chhak state zingah Mizoram chu state lian ber leh mipui tam berna ni lo mahse state dangte entawntlakin kan siam thei a ni, a ti a; Mizoram chu lehkhathiam rual awm khawmna, khawtlang inpum­khat leh ṭanrualna ram, state dangte tan rinawmna leh inhmangaihna kawngah te, tlawm­ngaihnaahte entawn turin awm zel ila, tiin mipuite a fuih.

Mizoram hi India rama state rethei zinga mi a ni a, mahni thawh chhuah nei tlem state a ni a, hei vang hian hmasawnna pawh a kal chak thei lo. State lian leh hausa zawkte nen chuan inkhaikhin rual a ni lo a, chutihlaiin hmar chhaka kan ṭhenawm state-te ai pawh hian kawng tam takah kan hnufual tawh zawkin a lang a, a pawi hle a ni.

Tun hmaa kan dahsan vak loh state ṭhenkhatte thil neih te, an hmasawnna ruhrel te, eizawnna bakah zirna leh thiamna lama an ke pen dante leh an khawhawi thlirin Mizoram hian entawn tur kan ngah tawh zawk hle tih a lang a, ṭan kan lak thar a ngai viau a ni.

State dangin min entawn se kan duh chuan entawntlaka ro kan rel a, ram kan kaihhruai a, dik leh rinawm taka kan kal a ngai. Tuna Mizoram dinhmun en hi chuan state dang tana entawntlak kan nihna aiin kan nih lohna bûk a rit zawk palh mai ang tih hlauhawm tak a ni.