Kuhva tawlh, kudam leh kan dinhmun

YMA, Serlui Group hruaitute chuan tun hnai khan an huam chhunga kuhva dah ṭhinnâ kudam hrang hrangah kuhva rah a awm leh awm loh an enfiah a, kuhva rah tam tham tak an hmù. Dan loa kuhva ro tawlh rûk avanga Bilkhawthlir leh Vairengtea kuhva huan neitute harsatna tawh chu an en liam mai mai dâwn lo tih an sawi.

Ram pawn aṭanga phalna nei loa kuhva rah tawlh hi 'smuggling' a ni a, chuti chung chuan hun rei tak chu zalen taka kalpui a ni. Chumi piah lamah kan kawngpui pawimawh sirah ualau taka dan loa kuhva rah tawlh luh dah khawmna kudam a awm mai hi thil mak a ni a, smuggling a zalen hle tih hai rual a ni lo.

Tunah chuan he smuggling nghawng hi kan hre chiang ta a, kan rama kuthnathawktute thawh chhuah ngei kuhva hralhna a buai zo ta a ni. Smuggler-te avanga kuthna­thawktute an buai viau hnuah pawh a khat tawkin kuhva rah tawlh ruk hmuh tur a la awm reng a, a pawi hle a ni.

Tunah chuan Mizoram Kohhran Hruaitu Committee-te hial an au chhuak tawh a, hemi boruak a awm hnu hian kan police lamin kuhva rah tawlh ruk an man ta nual mai a, a lawmawm hle a ni. Check gate awm reng chunga an paltlang thei reng si te, hun rei tak chhung an man hleihtheih loh hnua tun hnaia an man leh thei ta hle te hian ngaihtuahna a tithui viau mai.

Engpawhnise kan rama ualau taka smuggling thil dah khawmna kudam a awm reng leh YMA lamin an endik hmaa thuneitu lamin an ngaimawh lo emaw tih mai tur hi a mak a. Serlui Group YMA lamin kuhva chingtute harsatna en liam an tum lo hi thil lawmawm tak a ni.