Aizawl Sustainable Urban Transport Project

Aizawl Sustainable Urban Transport Project (ASUTP) hnuaia ruahmanna duan chhinte chu tun hnai khan Chief Minister hoin an sawiho a; Asian Development Bank funding hmanga khawpui chhung cheibawl leh tihhmasawn hna thawka hmalak theihna hrang hrang tarlangin, chumi aṭanga project siam theihte chhawpchhuah a ni.

Tam zawka public transport hman te, khaw chhung fai zawk leh mihring kalna pavement zauh te, lirthei park-na leh parking fee khawn dan changkang zawk siam te, khawpui chhunga junction pawimawh tak takte tih­hmasawnte an sawi zingah a tel.

ASUTP hnuaia ruahmanna awmte hi a zavai mai hian thil ṭha a ni a, khawpuiin hmasawn a mamawhna a nih hlawm avangin tihhlawhtlin theih ni se a lawmawm hlawm ang. Aizawl khawpui hi a tir aṭanga ruahmanna fel tak (plan) awm lo a ni a, tun hnaiah mihring, in leh lirthei a pung nasa si a, khawpui tawt leh chen hrehawm takah a chhuak zo ta a ni ber mai.

Kan Chief Minister hian khawpui traffic tawt lutuk hi a vei a, vawi tam tak a sawi tawh ṭhin a. Kum 2018 inthlan hmaa a au hla chu, 'Traffic jam awm lohna khawpuia Aizawl siam' a ni a, chu mai ni loin motor parking lama harsatna awm lohna khawpuia siam a tum bawk a. Kawng chhawng siam dan tur thlengin ngaihnawm takin a sawi thei.

Tunah hian heng thilte hian a tak a la chang hleithei lo a, hripui leng te pawh mawhpuh remchang tak a ni ang. Sum leh paia indaih lohna a awm tih kan hre bawk a, hengte leh chhan hrang hrang vangin Aizawl traffic jam tihreh lamah hmalakna a la tam vak lo.

Khawpui hma­sawnna tura ASUTP hnuaia ruahmanna te hi a hlawhtlin ngei theihna turin kan sorkar thuneitute hian ṭan la se.