Kawng chhia leh DC chet dan

Kolasib DC chuan Thingdawl leh Buichali inkara NH-54 kawng thawm ṭhat hna thawh mek a tlawh a, kawng chu mihring nunna atana hlauhawm nia a hriat avangin ni 10 chhungin a khuar chhe zual lai hnawh mám vek turin kawng enkawltu NHIDCL a hriattir. Kawngpui chhe zual lai thawm ṭhat chungchangah hian contractor-te chuan DC hmaah intiamkamna an ziak a, hriatpuituah NHIDCL leh PWD aiawhte'n hming an ziak a ni. 

Tun hnaia Mizo­ram mipuite ngai­mawh em em mai chu kan ram châk lâkna kawngpui pawimawh ber mai lirthei tana tlan hlauh­­awm khawpa a chhia hi a ni a, chief minister ho meuha an tlawh hnuah pawh he kawngpui hi a la ṭha thei chuang lo. Chief minister sawi danin awlsam taka siam theih mai a ni lo a, motor kháwl hmangin a chhiat dan lak vek a, thawh zawha lak leh tur a nih avangin chu khawl chu awlsam taka neih theih a ni lo a, hnathawh ṭan theih mai a ni lo.

Tunah hi chuan kawngpui a chhiat tawh em avangin mihring nunna atan hial a hlauhawm tawh a, a chhe zualpui thawm ṭha turin Kolasib DC-in contractor-te thu a pe ta a, thil lawmawm tak a ni. Contractor lamin kawngpui siam hna tak tak hi chhan hrang hrang avangin la thawk thei lo mah se, a chhe zualpui lai siam tur tala intiamna an nei ta hi a lawmawm a, contractor nawr ngam leh a nachang hria DC a awm hi a vanneihthlak hle.

Mizoram sorkar hian thil tam takah a hnuaia contractor-te hi a thurualpui ta emaw tih mai turin a khawsa fo a, con­tractor vila vau theitu tur department lam lahin an intiam rual­pui ta emaw tih mai awl takin an 'dawh thei' ṭhin a, a tuartu chu mipui an ni. 

Tuna Kolasib DC-in kawng­pui thawm ṭha tura NHIDCL-te a nawr lui ang hian contractor dangte pawh hi nawr lui ngam ila, kan kawngpui siama inhlawh turte'n an duh ang anga mipui min tawrhtir ṭhin hi sorkar chak loh vang a ni fo a ni.