Hnathawh hun hman ṭangkai

Larsap chuan tun hnai khan Khawzawl district a tlawh a, kawngpui laih leh hmasawnna ruhrel khawih mekte chu a hun takah thawh zawh a pawimawh a, project pakhat thawh rei lutuk avangin project ṭha tak tak tam tak kan chân phah thei tih sawiin Mizoramah hnathawh hun chhung a tawi tih chu chhuanlama hmang lo turin a chah.

Mizoramah ruahtui a tlak nasat avang leh inkal pawhna duhthu a sam loh avangin hnathawh theih hun chhung a tlem kan ti ṭhin a, thil dik pawh a ni ang. Hetihlai hian hmasawnna ruhrel lian tham tam tak chu hnathawh hun tawi chhuanlama hmangin a hunah thawh zawh a ni lo fo a, mipuiin an tawrh phah ṭhin.

Hna ṭhenkhat hi chu hna­thawktu lam an muang lui emaw tih tur khawpin an thawk chak lo a, a tawpah contractor lam tana sum hmuh belh dan leh sum hum theih dan a lo awm ta ṭhin bawk nen, a thawktu lam hi an hmanhmawh lo ṭhin hle tih a hmuh theih.

Larsap sawi ang hian kan hnathawh hun a tawi tih hi kan hriat lawk vek a nih avangin hnathawh theih hun awm te hi tun aia hman ṭangkai ni se, 'Kan thawh theih hun chhung a rei lo bik a,' tia chhuanlam siam mai loin hnathawh theih hun chhung ṭangkai zawka hman kan thiam a pawimawh hle a ni.