ILP chungchang

Mizo Zirlai Pawl chuan tun hnaiah Aizawla Inner Line Permit (ILP) nei loa hnam dang awm an dap a, mi 37 an hmù chhuak. MZP chuan Mizorama khua/ veng thuneitu zawng zawngte chu hnam dangte ILP pek chhuah chungchangah document felfai lote chu hriatpuina lehkha pe tawh lo turin an ngen nghal bawk a ni.

ILP hi Mizote tana thil hlu tak a ni a, hnam dangte an duh thala an lo luh mai mai theih lohna tur leh Mizorama an inbun ngheh mai theih lohna tur, Mizote himna tura thil pawimawh tak a ni. Hetihlai hian a Mizote bawk hian ILP hi kan humhalh thiam tawk lo niin a lang a, ṭhenkhat chuan sum hmuhna remchang atan hmangin hnam dangte an lo sponsor ṭhin a, a zialo hle a ni.

ILP pechhuaktu te, ILP sponsor-tu te, ILP chungchanga hriatpuina petute hi hnam dang ni loin Mizote tho kan ni a, kan zavaia kan fimkhur tlan phawt chuan ILP hi tun aia dik leh fir zawkin kan kalpui thei ngei ang.

Hetihlai hian ILP nei loa a ruka Mizorama lo a, hnathawka châm zui ta hi ṭhahnem tak an awm reng bawk a, heng mite man chhuah leh zawn chhuah kawngah hian sorkar lam a ṭan a ngai hle.

NGO lam zawkin a khat tawka ILP nei leh nei lo an enfiah bak hi sorkar aṭanga hmalakna hran a tam lo hle a, ILP kan neih hi dik taka kenkawh a nih theihna tur leh, ILP nei lote an lo luh ruk fo lohna turin sorkarin ṭan la thei se a lawmawm ang.