Lengpui Airport-a khualzinte harsatna

Lengpui Airport-ah tunlai hian bungraw nawrna (luggage trolley) hman tur a awm mumal loh avangin khualzinte'n harsatna an tawk a, ZPM ṭhalaite chuan tun hnai khan Lengpui Airport hi tlawhin trolley 22 chiah hman theih a awm thu an sawi a, airport sakna atan trolley hi an hmang nasain an tichhe nasa hle tih an sawi.

Lengpui Airport hian chanchin a ngah ta hle mai a, a chei ṭhatu tur contract inpek aṭangin thil fel lo awm nia ngaiin Mizoram First pawl chuan Chief Minister lakah Lokayukta-ah thubuai an thehlut hial tawh. He pawl hian airport chei ṭhat hna inpek danah induhsakna uchuak tak awmah an ngai a, CM chu thuneihna hmang sualah an puh a, General Financial Rules 2017 leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak turin Lokayukta-ah an lo thlen hial tawh.

Hetiang a nihlai hian airport hi a satute hian ṭha taka saka hnekin an sa ṭha tawk lo a, March 10, 2022 khan a chim nghe nghe a ni. A chim chhan hi a sak dan a ṭhat tawk loh vang a ni ber a, pawl hrang hrangin thuchhuah siamin hmanraw hman a dik loh thute hial pawh an sawi chhuak a ni.

Thuneitu lamin heng thilte hre chung hian mipui runluih niawm takin khualzinte harsatna mi tam takin an au chhuahpui tawh chu an la ngaihsak lo lui zel a, airport sakna atan trolley an hman chhiat nasat avang leh chhan dang avanga trolley indaih lohna pawh an la ngawih bopui lui zel a, a pawi ngawt mai.

Lengpui Airport-a contract hna inpek dan leh an hnathawh dana sawiselna hi chu thu dang ni se, he airport-a khualzinte harsatna tawh mek hi chu awlsam taka chinfel theih niin a lang. Chutihlaia thuneitute'n mipuite harsatna ngaihsak lo ang maia khualzinte hman tur daih trolley ṭha takngial pawh an pe hleithei lo hi chu a zialo deuh a ni e.