Kawngpui humhalh

Coordination Committee on management of Aizawl City chu tun hnai khan Aizawl Bawrhsap hoin an ṭhu khawm a, kawngpui tihnawk zawnga bungrua leh lirthei dah ṭhinte laka kawngpui humhalh an rel a, a bawhzuitu tur an ruat nghal.

Aizawl khawpui kawngpuite hi duh­thusamin a zau tawk lo a, chutihlaiin ṭha taka humhalh chu ni se tlang ram kawngpuiah chuan a te chhe hran lo. Lirthei leh mipui veivak tana harsatna thlentu ber pakhat chu kawng sira lirthei inhung tam lutuk te, a dahna hmun ni loa lirthei dah te, in sakna bungrua leh bungraw dang dah ṭhin vang te hi a ni, heng hian kawngpui a tizimin harsatna tam tak a thlen a ni.

Lirthei nei thar tur reng rengin a dahna tur garage an neih thu sorkarah an thlen vek a, chu chu a taka endika finfiah tura tih a ni bawk. Chutiang a nihlaia zan lama lirthei dahna nei loa kawngpuia riah an awm a nih chuan dan anga man mai a ṭha zawk mai thei; chhun lamah pawh lirthei hunna hi uluk zawka vil a ṭha ang.

Tui connection la tur leh thil dang avanga kawngpui laih chhiat hmuh tur tam tak a awm a, hemi kawngah hian Local Council lam an bengvara thikthu an tichhiat a ngai a, a thlenna tur dik thuneitu lamah thlenin dan anga hmalak a ṭul hle ang.

Aizawl khawpui kawng­puite hi a nihna tur anga ṭha zawka humhalh chu ni se tun aiin a tlo zawk ang a, traffic jam pawh a tlem phah sawt bawk ang a, thuneitu lamin theihtawp chhuah zel rawh se.