Assembly Budget Session-in ngaihven a hlawh

Mizoram Assembly Budget Session chu neih mek a ni a, mipui nawlpuiin TV lamah an en theih bakah YouTube ah en theiha pek chhuah a ni a, mipuiin ṭum dang zawng aiin an ngaihven niin a lang.

Assembly session hi hun eng emaw chen aṭang tawh khan TV lamah pek chhuah a ni reng ṭhin a, tunah chuan YouTube lamah pawh en theihin a awm ta a, mipui tan a remchang hle. Tunlai khawvelah chuan social media kan khawih nasain kan internet connection pawhin hma a sawn chho zel a, kan phone hmangin Mizoram rorel khawla rorelna pawh kan en thei ta a, hmasawnna lawmawm tak a ni.

A enna hmanrua kan neih ṭhat tak avang te, tun term-a budget session hnuhnung ber a nih tak avangte leh ṭhangtharten tun hma zawng aia politics lam an ngaihven tak avang pawh a ni mai thei, social media lamah budget session-a thusawiten ngaih­ven a hlawhin sawi zui pawh a hlawh viau a, thil lawmawm tak a ni.

Kan aiawha rorel tura kan thlan tlinte'n ram tana ṭha turin ro an rel mek a, mipuiin ngaihven deuh deuh ila. Kan hma lawkah inthlan a awm dawn bawk nen MLA ni zel tura kan duh leh duh lohte pawh ena tehna remchang a ni nghal ang.

Mipui nawlpuiin budget session kan ngaihven ta hi a lawmawm a, hmasawnna lawm­awm tak a ni a tih theih ang.