AMC leh free wifi

Aizawl Municipal Cor­poration (AMC) chuan Aizawl khawpuia hman tur free wifi an buatsaih pahnihna chu tun hnai khan an hawng. AMC mayor chuan kum 2016 November-ah Aizawla hmun pasarihah free wifi an pek tawh thu a sawi a, a contractor lam tih ṭhat tawk loh avangin a hlawhtling lo a, tunah hian contractor thar hnuaiah beiseina sang tak an neih thu a sawi.

AMC inthlan hnu­hnung berah kha chuan Mizoramah internet connection a la ṭha tawk lo a, khawpui ber Aizawlah pawh internet a la chak lo hle a, inthlan dawna inzawrhna atan free wifi tiam khan mipui a hip a, a bikin ṭhalai a hip hle. Nimahsela vanduaithlak takin AMC lamin thil harsa tak nia lang lem lo free wifi chu an kalpui hleithei ta tlat lo mai a, inthlan dawna an auhla zinga mipui hriat hlawh ber chu an mualpho phah ta hial angin a sawi theih ang. 

Free wifi pek theih loh avang maia mualpho chu AMC lam hian a duh lo a ni ngei ang, tunah an term tawp dawna ruaiah free wifi chu lian zawk leh chak zawkin an han bun thar leh ta a, tun ṭuma mi hi chu hlawhtling tawh hlauh se a duhawm khawp mai. Hetihlai hian politics lama thlir chuan free wifi hi AMC lam hian an hlawhtlinpui tak lohah khan duhtawk mai se mipui pawhin an theihnghilh ṭan tawh nia a lan laiin, AMC inthlan dawnah an rawn thar thawh leh ta rup mai a, sawi a hlawh thar leh dawn a ni.

Politics-ah hi chuan thlirna chi hnih a awm nghal lo thei lo - pakhat chuan, "AMC nge nge an lo rintlak e, an intiamna angin a tirah hlawhtling lo mah se an term tawp dawnah chuan hlawh­tling takin free wifi an pe," tiin an fak ang; thlirna dangah chuan, "AMC hian an mipuite free wifi pek hi an ngaihtuah tak tak lo a, kum tam tak free wifi pe loa an awm pawhin an ngaihsak lo a, AMC inthlan lo awm turah 'free wifi mai mai pawh pe thei lo' tia mipuiin an nuihzat an hlauh avangin term tawp dawnah hnawhsarum takin free wifi an pe leh ta," an ti ngei ang. 

Engpawhnise tun term-a AMC-te hi hriatrengna tur tam tak zingah an free wifi buaipui hi hriat an hlawhna ber tur pakhat a nih tak hmel a. Free wifi an pek leh tak avanga lawm leh AMC inthlan dawn tawha free wifi an pek thar leh avanga nui tet tet pawh an awm nawk dawn a nih hi.