AR sawn chhuah hun

Chief Minister Zoramthanga chuan Assam Rifles-te chu Aizawl khawpui laili aṭangin an insawn chhuak kim lek lek tawh tih Assembly Budget session neih mekah a sawi a, Covid-19 len hmaa AR-te insawn chhuak tura tihna order chu sût a la nih loh thu a sawi a, AR Commander thar pawh ṭum hnih a sawipui tawh tih House a hrilh.

Aizawl khawpui laili aṭanga AR-te insawn chhuak tur hi kan nghakhlel tlang tawh a, sorkar awm tawhte pawhin theihtawp an chhuah tlang niin a lang. An chenna tur ram pek an nih hnuah quarters sak a ni tawh a, êng, tui leh kawng pek an ni tawh bawk a, chuti chung chuan tun thlengin an la insawn chhuak lo.

AR insawn chhuah theih loh chhan nia an chhuanlam te chu state sorkarin a tihlawhtling zel chungin Chief Minister sawi angin sorkar laipui lamin a CM zawk dawt an sawitir leh ṭhin hi a pawi a. Order nen meuha an chhuah tur thu an rawn tihchian hnuah pawh tun thlengin an la chhuak lo cheu a ni.

Kan Chief Minis­ter hian AR hotute a dawr hian Aizawla awm an Commander chin hi chu dawr tawh loin headquarters lama Direc­tor General-te be thei se a sawt lehzual hmel a, a sawn chhuak theitu hotu lu lamah ṭuan se awmzia a neih theih a beiseiawm zawk awm e.