NHM hnathawktute

National Health Mission (NHM) hnuaia thawkten December 2022 leh January 2023 hlawh an la la lo niin Mizoram Pradesh Youth Congress Committee (MPYCC) chuan thuchhuah an siam a, a rang thei ang bera an hlawh te pe chhuak nghal turin Mizoram sorkar an phut.

MPYCC chuan NHM, Mizoram hnuaiah 4th grade aṭanga doctor specialist thlengin mi 2200 chuang an thawk mek tih tarlangin, "Hah pawh sawi thei loin mipuite hrisel nan indaih lo tak chungin an duty a ni. Hetih mêk laia an thlabi hlawh sorkarin a batsak reng ṭhin hi vanduaithlak kan ti hle," an ti.

NHM thawktuten hlawh an la thei lo hi a vawi khatna a ni tawh lo a, hun eng emaw chen chu a huna hlawh an lâk theih loh avangin harsatna an tawk tawh ṭhin a ni. A huna hlawh lâk loh hian chhungkua a nghawng nasa hle a, chhungkaw khawsak nasa takin a tihbuai phah a ni.

Sorkar hian NHM hna­thawk­tuten a hun taka hlawh an lak theih dan tur hian ruahmanna siam se, chhungkaw 60,000 chuang hnena pawisa sem tur ruahman theitu chuan a taka hnathawktuten hlawh an lâk dan tura ruahmanna siam hi thil tih theih loh a ni lo ang - a ngaih pawimawh duh leh duh lohah a innghat ang.