Nungcha humhalh leh Silai hmeh puah

Tun hnaiah Phawngpui National Park-a dan loa silai hmet puaktu mi pahnih chu Police ten an man. Heng mite hi phalna nei loin Phawngpui tlángah hian an láwn a, an silai hmet puak lai video hi a darh a, thuneituten chhui zuiin an man ta a ni.

Nungcha hum­halh kan inzirtir mêk laia sorkar laipuiin national park-a a puan chhungah ngei silai hmet puak an awm hi a pawi hle a, man ngei pawh an phu reng a ni. Dan phal lohna hmunah phalna nei loin an kal a ni mai lo a, silai an hmet puak zui hi a fel lo hle a ni.

Hman deuhah khan kum hlui thlah zana silai hmet puak video pakhat chu a darh chiam tawh a, Aizawl khawpui chhunga thil thleng niin a lang. A hre chiangte sawi danin sorkar hruaitu zinga mi a ni nghe nghe awm a, thuneituten an chhui zui lo a ni mai thei, man a nih thu hriat zui a ni lo.

Engpawhnise dan phal loha silai hmeh puah hi thil fel lo tak a ni a, nungcha humhalh kan inzirtir mêk laia mipui vantlang hmuha silai hmeh puah hi thil ṭha lo tak a ni.

Chutihlaiin an silai hmet puak lai hmuh ni chiah lo mah se ramsa leh sava an kap ngei tih hriat hi khaw hrang hrangah an awm reng tho a, heng mite lakah pawh hian sorkar hi a thikthu tichhe zual se a ṭha hle mai.