Hlawh pek hunin danglamna a siam em?

Finance department enkawltu Mizoram Chief Minister chuan sorkar hnathawkte'n a hunah hlawh la thei lo mah se an hlawh zat chu a kiam chung lo tih sawiin, "Ni 1-a pek a, a thla leh ni 1-ah pek leh emaw, ni 15-a pek a, a thla leh ni 15-a pek pawh kha a ammount a inang reng tho a, a danglam lo reng reng a. Ni 10 apianga pek emaw, ni 15 apianga pek emaw, ni 1 apianga pek emaw kha a inang vek a ni," a ti a; hlawh pêk ní chu eng hun pawh ni se, a danglam tam lo niin press conference-ah a sawi.

Kan sorkar sum bawm enkawltu ber chuan a huna hlawh lak emaw, lak tlai deuh emaw chu a hlawh zat (amount) a inang reng a, chuvangin a danglam lem lo niin a sawi. Hei hi kan hotupa berin thil a thlir dan a nih chuan hlawh lak tlai hian pawina a nei lo a ang a, an hlawh zat tur dik tak an lak leh tho chuan tlemin la tlai deuh mah se a inang niin a sawi a ni ber mai.

A huna hlawh lak loh hian mi tam tak loan a nghawng a, housing loan te, lirthei loan-te leh loan dangte a huna pek a nih loh hian chawi belh a awm thei a, chawi belh lo pawh ni se credit score-in a tuar a, hei hi a pawi hle. In luah man pek a ngai a, a loa kan awm theih loh bill hrang hrang hunbi neia pek a ngai a, hengte hi hlawh lak tlai hian a nghawng vek a ni.

Mizoramah industry lian tham sawi tur kan nei lo a, multi national company pawh an awm lo a ni ber a, sorkar hnathawkte hlawhah hian a thawk ve lem lote pawh thui tak an innghat. Sorkarin sum a neih loh chuan bazarah sum leng vak a tlem a, sumdawngte changin an tuar lo a, mipui mimirin an tuar vek a ni.

A huna hlawh sem theih loh pawi ti tur bera ngaihin a pawi vak loh dan thiam taka a sawi mawi hi a zia lo a, sorkar hnathawkte'n hlawh an lak tlai hian Mizoram mipui nawlpui sum leh pai che vel nasa takin a nghawng a; hetiang dinhmuna min dahtu berin hlawh lak tlai sawi mam a tum anga lang hi, sorkar hnathawkte leh mipui zah lohna rawng a kai thei lek lek mai.