Health care bill ba hi

Assembly Budget session kal meka zawhna chhangin Health Minister chuan, Mizoram State Health Care Scheme hnuaiah bill ba cheng vaibelchhe 65.90 a awm mek a, January 5 thlenga bill thehlut tawh zingah bill la thei lo 23,462 an awm thu a tarlang.

Damlo inenklawlna senso intumsak hi thil awlai a ni hauh lo a, sorkar chak leh lian ber ber pawhin harsatna an lo tawh tawhna ṭhin a ni. Hetih lai hian kan rama healch care scheme kan kalpui dan hi chu ennawn deuh ngai a awm a, a hminga health care scheme nei ve si, a taka kalpui theih si loh hi a ang ta ber mai.

Tu pawh sorkarna vawnfung chelhtu ni se, tuna Mizoram State Health Care Scheme kalpui dan ang hi chuan leiba hi an chingfel dawn hauh lo tih a chiang reng a, heng damlote harsatna chingfela a hun taka bill pe thei tur hi chuan state sorkar hausa ve tak nih a ngai. Chutih laiin tunah hi chuan kan sorkar hian Mizoram State Health Care Scheme hi a ngaihsak tak tak lo a ang a, a ngaih pawimawh thilah sum a pek theih reng laia damlo pawisa heti zat a ba hi chu a zialo lam deuh a ni.

Mizoram State Health Care Scheme-a pawisa pek loh hi sorkarin mipui lei an ba lêt tawh zawk tihna a ni a, mipuiin an tihtur tiin pawisa sengin an inziak lut tawh a, sorkar lo tih ve tur chu an damlo inenkawlna senso lo pek hi a ni. Hmun ṭhenkhatah a thlawna pawisa sem tur uar taka sawitute thoin damlo inziak lutte registration fee aṭanga thawktute hlawh pe chunga damlote bill an ba ṭen ṭun hi a zialo a, mahni mipui damlote cheng vaibelchhe 65.90 zet batsak hi chu a tam lulai deuh chu a ni.