Reiek tlang chei hna tu thawh nge?

Tourism Department hnuaia hnathawh, 'Component 1 of Development of Immediately Required Infrastructure for Tourist Development at Reiek tlang,' tuna thawh mek chu a hmunah kalin ZPM chuan tun hnai khan an enfiah a; he hna hi restricted tender hmanga DJ Consultancy Services, Sikulpui-kawn hnena pek a ni chungin, a taka thawktu chu Tourism Minister fapa consultancy firm NECS an ni tiin an puh a, Tourism Minister chu insawifiah turin an phût.

A zirchiangtu nia inchhal ZPM chuan he hna thawhnaah hian NECS an inrawlh ngei tiin, "A hmuna kala kan zawh chuan hnathawktute leh viltute hi NECS hnuaia thawk vek an ni. Kan kal laia hna an lo thawh mek Architecture & Structure Drawing pawh NECS siam a ni," an ti.

Mipui nawlpui tan he thilah hian ngaihdan siam thiam a harsa a, inpuhna a awm a, a puhate lam an la insawifiah lo. Eng tikah emaw an la insawifiah dawn pawh a ni mai thei a, chutih laiin insawifiah hnuah a fiah sawt dawn nge; a nihna tak hi a lang fiah dawn chuang lo ang, tih hi inzawh tham a ni.

Politics-ah hi chuan inpuhna a awm a, sawifiahna a awm ṭhin a, a pawimawh ber erawh chu, 'A puhtute hian thudikin an puh em?' tih a ni a, chumi tiat chiah chuan, 'An insawifiahna hi thudik a ni em?' tih a ni leh bawk. A khawi zawk zawk emaw hi phuahchawp mai a nih chuan mipuiin thudik an hre thei ngai dawn lo a ni.