Horticulture link road laihna sum chingpen

Report of the Comptroller and Auditor General of India on Social, Economic and Revenue Sectors for the year ended March 31, 2020 chu Chief Minister-in tun hnai khan Assembly session-ah a pharh a, Horticulture department hnuaia link road laihnaah sum hman dik loh cheng vbc. 2.94 a awm tih an chhui chhuak.

CAG report-a tarlan danin, kum 2018-19 khan NEDP sum cheng vbc. 26.73 hmangin Horticulture department chuan departmental-in horticulture link road (all weather road) an lai a; hmun 134-ah an hnathawh hi zir chian a ni a, thil fel lo tam tak an hmu chhuak.

An thil hmuh chhuah zingah lei laihna khawl excavator hman (hire) hun chhung anga tarlan chu hna thawh hun chhung aiin a rei zawk a, a hman man an pek chhuah ringawt pawh cheng nuai 72.15 a ni. Excavator registration number endik a nih hnuah bike, scooter, car etc. number a ni tih hmuh a ni a, heng excavator hire-na lama pawisa hman ral hi cheng vbc. 1.10 a ni.

Kan rama sum chingpen dan en hian tute emaw hi chuan pawisak nei miah loin mipui sum hi an eiru tih a lang chiang a, hei hi mipui chanai eisakna dik tak a nih bakah ram rohlu tur tihchhiatna a ni a, ram leh hnam hmelmate tih awma mawi a ni.

CAG report hi a kal muang deuh ṭhin a, tuna mi hi 2018-19 sorkar kuma thil thleng a ni a, hetiang ringawta mipui sum chheprela hmasawnna tur suasamtute hi Mizo mipuiin kan chhinchhiah a ṭha hle ang.

Horticulture department hnuaia sum chingpen ngei tih CAG meuhin a finfiah tawh hi political party-in an aupui chuan, 'politics-a inchirhthehna' ti lekin kan en liam ang tih a hlauhawm a, kan tlawmngai pawl hrang hrangte pawh hian hetiang hi ngaimawh ngam se a ṭha ngawt mai.