Airport-a buaina ber hi trolley hi a ni lo

MNF chuan thuchhuah siamin Lengpui Airport-a passenger baggage trolley ṭhenkhat chu airport chei ṭhat hnathawhna atana hmangtute chu hrem an ni dawn an ti a, he thu hi GAD (Aviation Wing) lamin office order hmangin an chhuah tawh a; an tihchhiat man ang hu chawitir an ni dawn.

Hetihlai hian Congress Action Committee huaihawtin Chief Minister hnenah trolley pek tumin party mi leh sate tun hnai khan Treasury Square-ah an pungkhawm a, CM programme pawimawh neih a tihkhaihlak theih dawn avangin an thil tum hi an ṭhulh niin Congress hruaitute chuan an sawi.

Airport trolley chungchang hian Assembly House chhung thlengin sawi a hlawh a, hei hi a buaina ber ni loin ngampa taka trolley an hman bawrh bawrh ngam chhan hi a buaina bul chu a ni. Mipui hi trolley buaia kan buai tur a ni lo a, 'Engvangin nge contractor pakhat ve maiin sorkar bungrua ngampa taka a hman ngam a, engvangin nge khap a nih loh?' tih hi kan zawng chhuak zawk tur a ni ang.

Lengpui Airport chei ṭhat hna hi a bilhah a tho lo a, contract hna inpek aṭangin Chief Minister chu thuneihna hmang sualah puh niin May, 2022 khan Lokayukta-ah thubuai thehluh a ni tawh. Airport saklai hi a sak chhiat vangin a chim tawh a, tunah hnathawktute'n khualzin hman tur trolley duhdah taka an lo hman avangin harsatna a thleng leh mek a ni. Lengpui Airport-a buaina ber hi chu a chei ṭhat hna inpek dan, hnathawktu thlan dan leh an hnathawh dan ṭha tawk lo hi niin a lang.