Mizoram tihhausak

Chief Minister chuan Mizoram chu tlangram kal pawh harsa tak, tihhmasawn dawn pawha hautak tak anga ngaih theih ni mah se hmasawnna potential ṭha tak a neih thu leh, ram min petuin min pek chhan a awm a ni tih ngaihtuahin, ram hausaah kan siam thei a ni, a ti.

Mizoram hian hmasawn turin theihna a nei ngei ang tih hi a chiang a, chutihlaiin a tihmasawn thei dinhmuna ding tawhte hian an thawk ṭha tawk lo a ni mai thei; khawvela ram hmasawn ber zinga mi pawh ni phak lo India ram chhunga state zingah pawh a hmasawn lo pawl kan la ni reng mai a, a vanduaithlak hle a ni.

Kan ram hi leilung ṭha tak nei, sik leh sa pawh nuam tawk tak, thlai leh thei chitin ṭhat duhna a nih thu hi kan sawi nasa ṭhin a; nimahsela tun thlengin buh leh balah kan la intodelh lo em em a, kan rama ṭha duh tak thei leh thlaite pawh a thawn chhuah dan mumal tak kan la nei thei lo a ni ber mai.

He state-a sum lut zozai leh a hmang­tu mihring tlem dan aṭanga chhut hi chuan tun aia hmasawn deuh tawh tur hi kan nih ngei hmel a, tunah hi chuan kan rama mi tlem te-te kutah hian kan ram sum leh pai tam tak hi a lut khawm mek tih hai rual a ni lo.

Mizoram hi ram hausaa siam tur hian state pawn leh ram pawna mite'n min rawn thawhsak dawn lo a, a ram leilung fate ngeiin kan thawh a ngai a, kan hausak theihna sawi renga kan rethei em em si hi a zialo ngawt mai.