Kohhran inthlan thuchah

Mizoram Kohhran Hruaitute Committee chuan kum 2023 kum tawpa MLA inthlanpui lo awm tur pualin thu an chhuah a, political party-te chu an thuchhuah ngai pawimawh turin an ngen.

MKHC-in political party tinte chu candidate thlang fimkhur turin an ngen a. Pathian ṭih mi, mi hming ṭha leh rinawm, ruihtheih thila fihlim, hlepna bawlhhlawh leh thamna duh lo, mipat hmeichhiatna lama hminghliauna nei lo thlang turin an ngen. Hei bakah hian vote leina anga ngaih theih sum leh thil dang sem lo turin an ngen a, a taka tih theih loh tur intiam lo turin party leh candidate-te an ngen bawk.

Kohhran hruaitute'n can­didate atana an duh leh an duh loh an sawi hi a chiang kek kawk hle mai a, political party lam pawhin ngai pawimawh tlang se a ṭha hle mai. Pathian an ṭih leh ṭih loh lam hi chu teh a harsa deuh mai thei a; nimahsela 'ruihtheih thila fimhlim' han tih te, 'mipat hmeichhiatna lama hminghliauna nei lo' han tihte hi chu a kohhran lam ngei pawh hian party hruaitute kawmin sawi chiang ngam se a ṭha hle ang.

Tihhlawhtlin theih loh tur intiam lo tura an ngennate hi party lam hian ngai pawi­mawh se a ṭha a, intiam tawhna tihhlawhtlin loh te thleng pawhin ngaimawh ngam se a ṭha ang.

MKHC hian kan hmalama inthlanna lo awm tura thu an chhuah rual hian inthlan kal tawha an thuchhuahte'n zawm a hlawh leh hlawh loh pawh ennawn ngam se; an thuchhuah hian zawm a hlawh leh hlawh loh chungchangah vantlang hriat tur ni kher lo pawhin party hruaitute pawh titipui thei se an thuchhuah hian awmzia a nei leh zual awm e.