Party tana MGNREGS hman

All Mizoram Village Council Association (AMVCA) chuan, Mahatma Gandhi National Rural Employment Guarantee Scheme (MGNREGS) hnuaia material component chu party mite induhsakna atan hmangah Mizoram sorkar an puh a; an kalphung siamṭha turin sorkar an phût. 

AMVCA hian thuthar thehdarhtute an kâwmnaah sor­karin MGNERGS a kalpui dan hrang hrang leh ruling party induhsakna atan an hman ṭhin thu an sawi chhuak a; MNF chu eptu lama an awmlaia ruling party-in MGNERGS an kalpui dan sawisel ṭhintu ni si, an sawiselte ang chiaha khawsa ve zuiah an puh.  

Mizoramah chuan, 'Eptu party apiangin ram an hmangaih,' tia fiamthu an sawi hi a tak a chang ta mai emaw tih tur a ni a, sorkarna vawnfung chelhtu an nih meuh chuan a hmaa an sawisel ang chiahin an awm hreh lo ṭhin a, a vanduaithlak hle a ni. Thingtlang miten innghah nana an hman pakhat MGNERGS pawh party hamṭhatna atana hman hreh lo sorkar kan nei zel mai hi Mizoram thingtlang mite vanduaina belhchhahtu a ni hial ang. 

Sorkarna vawn­fung chelhtu lamin an party mite an duhsak duh a nih pawhin thil tih theih dan hrang hrang a awm ang a; nimah -sela MGNERGS atana sum dah la hek zawng leh, thingtlang hmasawnna tur tiching­pen zawnga sorkar a lo khawsa a nih chuan a dik lo hle a ni. 

AMVCA-in sorkar an puhna hi thil dik lo ni zawk se a duhawm hle a, chuti ni loa a sorkar berin central sorkar aṭanga MGNERGS sum a hmuhte a hmang ṭha lo a nih chuan a tuartu tur chu thingtlang mipuite an ni si a.