Central Jail dinhmun

Aizawl district Bawrhsap chuan tun hnai khan central jail a tlawh a, mi 436 tan theihna turah jail tang 825 an awm mek a; Central Women Jail-a mi 96 awm theihna tura ruahmanah mi 214 an tang mek bawk.

Tan inah heti zat mi an awm khawm hi a pawi takzet a, a tira kan sorkar ruahman lawk aiin jail tang an tam ta a tih theih. Chutihlaiin jail tangte kan ngaihsak tawk loin an lenna tur khawp hmun pawh kan nei ta lo, a tih theih bawk ang.

Sorkar tan ngaihtuah ṭul tam tak a awm a, sum senna tur a tam avangin Central Jail chei ṭhat emaw, zauh belh emaw, a hmun dang ngaihtuah emaw hi thil awlsam a ni lo ang. Chutihlaiin jail hi misual hremna ni ringawt loin siam ṭhatna hmun a nih tel bawk avangin tun anga in beng vak mai hi chu a fuh lo hle a ni.

Sorkar hian a ngaih pawimawh lamah chuan infrastructure thar din lam chu a kalpui thei reng a, 'misual' tia kan ngaihthah ngawt rem lo kan unaute jail-a tang mekte hi kan ngaihven thar vat a ṭul. Central Jail hi zauh theih a nih loh chuan tan in zau leh changtlung zawk dang din a ṭul tawh takzet tih a lang.