Kawng chhawng la neih loh chhan

Chief Minister chuan Assembly Budget Session-a zawhna ziaka chhangin, Vaivakawn kawng péngṭhuam leh Bawngkawn péngṭhuama flyover bridge siamna atan Mizoram PWD-in ruahmanna a kalpui reng tih a tarlang a, "Zirchianna neitu tur consultant-te nen pawh agreement April 2, 2020 khan ziah fel a ni tawh," a ti a; Covid-19 avangin ruahmanna angin hna a thawh chak theih ta lo nia tarlangin Chief Ministerchuan, "Zirchianna pawh ruahman hun aia tlaiah zawh fel theih chauh a ni," a ti a; chu'ngte avang chuan kawng chhâwng siamna tura hmalaknate chu beisei aiin a tlai ta niin a tarlang.

Chief Minister hian Aizawl traffic jam avanga harsatna awm hi a vei takzet tih a hriat a, hei vang hian a chin fel dan tur ruahmanna hrang hrang a duang. Tun hmaa kan la hriat ngai loh PAHOSS a ngaihtuah chhuak a, a tum hi thil ṭha tak ni mah se a kalpui dan en hi chuan parking lam aiin garage lam a hnaih ta mah mah a, sum senso a tam tehlul nen traffic jam tihziaawmna kawngah chuan a thawh hlawk vak lo niin a lang.

Chief Minister hian kawng chhawng a ngaihtuahna a rei tawh bawk. Kum 2018 inthlan hma khan kawng chhawng siam dan tur hi TV interview-naah thiam takin a lo sawi tawh a, traffic jam avanga buai lo leh lirthei parking awm lohna khawpuia siam pawh a duh hle a ni.

Tuna sorkar ruahmanna awm, Vaivakawn leh Bawngkawna flyover ringawt hi chu Chief Minister kawng chhawng sawi ṭhin nen kha chuan a inang ta lo deuh a, hei hi chu kawng lun laia pumpelh satliah mai niin a lang.

Mipuiin an ngaihven leh nghahhlelh hi chu kawng lun laia flyover mai ni lo, kawng chhawng indawh phei zui mai a ni a, hei hi hlawhtling thei hlauh se Aizawl khawpuia traffic jam vanga buaina hi thui tak a chingfel thei ngei ang.